ஜோகனஸ்பர்க் அணி தோல்வி: தென் ஆப்ரிக்க ‘டி–20’ போட்டியில் | ஜனவரி 15, 2023

கேப்டவுன்: தென் ஆப்ரிக்க ‘டி–20’ லீக் போட்டியில் ஏமாற்றிய ஜோகனஸ்பர்க் அணி 7 விக்கெட் வித்தியாசத்தில் கேப்டவுன் அணியிடம் வீழ்ந்தது.

தென் ஆப்ரிக்காவில், ஐ.பி.எல்., பாணியிலான ‘டி–20’ லீக் கிரிக்கெட் முதல் சீசன் நடக்கிறது. கேப்டவுனில் நடந்த லீக் போட்டியில் ஜோபர்க் சூப்பர் கிங்ஸ் (ஜோகனஸ்பர்க்), எம்.ஐ. கேப்டவுன் அணிகள் மோதின. ‘டாஸ்’ வென்ற கேப்டவுன் அணி ‘பீல்டிங்’ தேர்வு செய்தது.

ஜோகனஸ்பர்க் அணிக்கு ரீசா ஹென்டிரிக்ஸ் (2), கேப்டன் டுபிளசி (8) ஏமாற்றினர். லியூஸ் டு பிளூய் (21), ஜானேமன் மலான் (16), ஜார்ஜ் கார்டன் (13*) ஆறுதல் தர ஜோனஸ்பர்க் அணி 20 ஓவரில் 9 விக்கெட்டுக்கு 105 ரன் எடுத்தது. கேப்டவுன் சார்பில் லிண்டே, ரபாடா, ரஷித் கான், ஒடியன் ஸ்மித் தலா 2 விக்கெட் சாய்த்தனர்.

சுலப இலக்கை விரட்டிய கேப்டவுன் அணிக்கு பிரேவிஸ் (42), ரியான் ரிக்கெல்டன் (21) நல்ல துவக்கம் தந்தனர். வான் டெர் துசென் (14*), சாம் கர்ரான் (15*) கைகொடுக்க கேப்டவுன் அணி 16.2 ஓவரில் 3 விக்கெட்டுக்கு 107 ரன் எடுத்து வெற்றி பெற்றது. இதுவரை விளையாடிய 3 போட்டியில், 2 வெற்றி, ஒரு தோல்வி என, 9 புள்ளிகளுடன் கேப்டவுன் அணி முதலிடத்தில் உள்ளது. ஜோகனஸ்பர்க் அணி (ஒரு வெற்றி, 2 தோல்வி) 4 புள்ளிகளுடன் 5வது இடத்தில் உள்ளது.